Kemansangka rumah panjai kita, pia ku Rundi

March 8, 2010, Monday

Utusan Borneo

Ungkup diberi perintah ngagai rumah panjai sitak Pandan, Binyo enggau Sungai Jelalong

GAGA RUMAH PANJAI KITA: Dr Rundi (dua kiba, duduk) berandau enggau bala tuai rumah panjai ari Bintulu ke bisi nemuai ngagai iya.

KUCHING: Tuai pupu raban bansa sereta tuai rumah ari rumah panjai sitak Pandan, Binyo enggau Sungai Jelalong Bintulu madahka pengaga ati sida iya lebih pejalai sida iya nemuai ngagai Kaban Kunsil Nengeri (ADUN) Kemena Dr Stephen Rundi sigi bisi asil.

Tuai Rumah, Nyipa Tinggang lebuh ditemu ulih Utusan Borneo madahka sida iya gaga ati lebuh Dr Rundi meri ungkup kena ngemansangka rumah panjai sida iya.

“Kami ke nemuai kitu dalam 22 iku ari sekeda rumah panjai ari sitak Pandan, Binyo enggau Sungai Jelalong bisi nemuai ngagai Dr Rundi ba opis iya saritu tadi. Kebuah kami ke kitu laban deka mantai ngagai iya sekeda penanggul ke ditunga ulih bala kami ke diau ba rumah panjai di Bintulu,” ku iya.

Nyipa ti mega bekau Presiden Gerempung Main Bol Sarawak (FAS) madahka penanggul ti besai ke ditunga ulih tuai rumah sitak nya laban penadai setipikit kelala ulih perintah.

Ku iya, enti nadai setipikit kelala nya sigi pedia ke sida iya tuai rumah ngemutarka tanggung pengawa sida ngagai orang mayuh ke diau ba rumah panjai.

“Sigi mayuh bala kami (tuai rumah) bedau bulih setipikit kelala tu. Nya alai enti bisi sebarang penanggul ke ditunga ulih orang mayuh ba rumah panjai sigi pedis teputar lalu nya ngambi timpuh ke panjai deka mutarka penanggul nya,” ku Tuai Rumah Nyipa.

Kelimpah ari setipikit kelala nya, orang mayuh ke diau ba rumah panjai mega betunga enggau penanggul infrastruktur baka jalai alun, gaya rumah panjai ke patut digaga manah agi, sereta bekal perengka guna bukai.

Ku Nyipa, udah betemu enggau wakil rayat nya, dikarapka penanggul sida iya ulih dikemutar enggau jampat.

“Aku mega beterima kasih ngagai pengari rayat kami (Dr Rundi) enggau perintah menua laban chukup beratika penanggil kami ke diau ba rumah panjai ba sitak Bintulu,” ku iya.

Geran urung RM208,000 bisi disua ulih Dr Rundi ngagai 22 iku tuai rumah kena sida iya ngemansangka mayuh macham program pemansang kena rumah panjai sida iya.